अखबार नेपाल ट्रेन्डिङ

काठमाडौं: दोलखाको गौरीशंकर गाउँपालिका-७ मार्बुमा पहिरो जाँदा ४ जना बेपत्ता भएका छन् । बिहीबार साँझ पहिरो जाँदा  स्थानीय करिब ५५ वर्षीय कृष्णबहादुर मगर, उनकै श्रीमती देवी मगर, अर्का वृद्ध हरिलाल श्रेष्ठ र ३ वर्षीय  बालक प्रिन्स थामी बेपत्ता भएका हुन् ।

सदरमुकामबाट उत्तरी क्षेत्रमा अवस्थित मार्बुमा झरेको पहिरोमा तीनजना गम्भीर घाइते भएका छन् । स्थानीय यज्ञ थामी, उनकी श्रीमती धनकुमारी थामी र बुहारी सरिता थामी घाइते भएका हुन् । उनीहरुलाई हेलिकप्टरमार्फत काठमाडौं लगिँदै छ । उत्तरी गौरीशंकर गाउँपालिका-७ मार्बु गाउँको टोपाटार बस्तीमा बिहीबार साँझ  खारेतर्फको भीरबाट बस्तीमा पहिरो झरेको थियो ।

पहिरोले बस्तीका ५ घर पुरेको मार्बुका वडाअध्यक्ष सोनाम शेर्पाले जानकारी दिए । सुरक्षाकर्मी र स्थानीयले बेपत्ताको खोजी गरिरहेको इलाका प्रहरी कार्यालय सिंगटीले जनाएको छ । रासस