अखबार नेपाल ट्रेन्डिङ

काठमाडौं: सत्ता गठबन्धनमा आबद्ध १० दलको बैठक आज बस्दैछ । गठबन्धनको बैठकमा छलफल गरी मन्त्रालयको बाँडफाँड टुंगो लगाइने बालुवाटार स्रोतले जनाएको छ ।

सोमबार माओवादी केन्द्रका अध्यक्ष एवम प्रधानमन्त्री पुष्पकमल दाहाल ‘प्रचण्ड’, कांग्रेस सभापति शेरबहादुर देउवा र नेकपा एसका अध्यक्ष माधवकुमार नेपालबीच छलफलपश्चात आज ४ बजे बैठक बोलाइएको हो ।

गठबन्धनमा आबद्ध दलहरुबीच मन्त्रालयको विषयमा भागबण्डा नमिलेपछि मन्त्रिपरिषद् विस्तारमा ढिलाई भएको छ । सोमबार पनि तीन शीर्ष नेताले आ-आफ्नो अडान नछाडेपछि सहमति जुट्न नसकेको हो ।

प्रचण्ड प्रधानमन्त्री भएको तीन महिना भयो । तर, अझै पनि सरकार पूर्ण भएको छैन । १६ मन्त्रालय प्रधानमन्त्रीकै काँधमा छ । गृह, अर्थ, परराष्ट्रजस्ता अति महत्त्वपूर्ण मन्त्रालय पनि लामो समयदेखि मन्त्रीविहीन छन् ।

माओवादी केन्द्रसहित, कांग्रेस, राष्ट्रिय स्वतन्त्र पार्टी (रास्वपा) जनता समाजवादी पार्टी (जसपा), नेकपा एकीकृत समाजवादी पार्टी, लोकतान्त्रिक समाजवादी पार्टी (लोसपा) नेपाल, जनमत पार्टी, नागरिक उन्मुक्ति पार्टीले सरकारमा जाने तयारीमा छन् । कांग्रेसले अर्थ मन्त्रालयसहित आठदेखि १० मन्त्रालयको दाबी गरिरहेको छ । माओवादी केन्द्रको गृहसहित कम्तीमा ५ मन्त्रालयको दाबी छ ।

रास्वपा, जसपा, एकीकृत समाजवादीले महत्त्वपूर्ण मन्त्रालयसहित तीन/तीन मन्त्रालयको दाबी गरेका छन् । रास्वपाले उपप्रधानमन्त्री सहित केही मन्त्रालय दाबी गरेको छ । जनमतले कृषि, पशुपन्छी वा उद्योग, वाणिज्य तथा आपूर्ति मन्त्रालयको दाबी गरेको छ । नागरिक उन्मुक्ति र लोसपा पनि शक्तिशाली मन्त्रालय माग गरेका छन् ।

प्रधानमन्त्री तथा मन्त्रिपरिषद्को कार्यालयसहित २२ मन्त्रालय छन् । यो मिलाउन सत्तारुढ दललाई सकस भएको छ । अझ स्वतन्त्र सांसद अमरेशकुमार सिंह र प्रभु साहको मन्त्रीमा दाबी छ । पार्टीभित्रै आकांक्षी धेरै छन् । जसले गर्दा कसलाई मन्त्री बनाउने भन्ने पार्टी–पार्टीभित्र पनि आन्तरिक विवाद छ ।