विश्वकपमा ब्राजिल र क्रोएसिया क्वाटरफाइनलमा प्रवेश
वि.सं.२०७९ मंसिर २० मंगलवार ०७:५८
काठमाडौं: कतारमा जारी फिफा विश्वकप फुटबलमा दक्षिण कोरियालाई हराउँदै ब्राजिल र जापानलाई हराउँदै क्रोएसिया क्वाटरफाइनलमा प्रवेश गरेको छ ।
सोमबार राति स्टेडियम ९७४ मा भएको खेलमा दक्षिण कोरियालाई ४-१ गोल अन्तरले हराउँदै ब्राजिल अन्तिम आठमा पुगेको हो । ब्राजिलले दक्षिण कोरियाविरुद्ध पहिलो हाफमै ४ गोल गरेको थियो ।
खेलको ७औं मिनेटमा भिनिसियस जुनियरले गोल गर्दै ब्राजिललाई १-० गोलको अग्रता दिलाएका थिए । खेलको १३औं मिनेटमा नेयमारले पेनाल्टीबाट गोल गर्दै ब्राजिललाई २-० गोलको अग्रता दिलाए ।
दक्षिण कोरियाका वु योङ जोङले रिचार्लिसनलाई आफ्नो पेनाल्टी क्षेत्रमा लडाएपछि ब्राजिलले पेनाल्टीको अवसर पाएको थियो। जसमा नेयमारले सहजै गोल गरे ।
खेलको २९औं मिनेटमा रिचार्लिसनले गोल गर्दा ब्राजिल ३-० ले अघि रह्यो । खेलको ३६औं मिनेटमा लुकास पाक्वेटाले गोल गर्दै ब्राजिललाई ४-० को अग्रता दिलाए ।
त्यसपछि खेलको ७६औं मिनेटमा दक्षिण कोरियाका पाइक सुएङ-होले एक गोल फर्काएपनि ब्राजिल ४-१ ले विजयी भयो ।
यसैबीच सोमबार राती नै भएको पहिलो खेलमा साविक उपविजेता क्रोएसिया क्वाटरफाइनलमा प्रवेश गरेको छ । जापानलाई पेनाल्टी सुटआउटमा ३-१ गोल अन्तरले हराउँदै क्रोएसिया अन्तिम आठमा पुगेको हो ।
निक्कै नै प्रतिस्पर्धात्मक बनेको खेलको निर्धारित ९० मिनेट र थप गरिएको अतिरिक्त समय १-१ गोलको बराबरीमा सकिएपछि खेल पेनाल्टीमा गएको थियो ।
क्रोएसियाका निकोला भ्लासिच, मारियो पासालीच र मार्सेलो ब्रोजोभिचले पेनाल्टीमा गोल गरे । मार्को लिभाजा पेनाल्टीमा चुके ।
जापानका ताकुमा असानोले गोल गर्दा ताकुमी मिनामिनो, माया योशिदा र कोरु मितोमाले गोल गर्न सकेनन् । तीनै जनाको पेनाल्टी प्रहार क्रोएसियाका गोलकिपर डोमिनिकले बचाए ।
पेनाल्टीमा जानु अघि खेलमा सुरुआती अग्रता भने जापानले बनाएको थियो । खेलको ४३औं मिनेटमा डाईजेन माएडाले गोल गर्दै जापानलाई १-० को अग्रता दिलाएका थिए ।
तर, दोस्रो हाफमा क्रोएसिया खेलमा फर्किएको थियो । खेलको ५५औं मिनेटमा इभान पेरिसिचले गोल गर्दै क्रोएसियालाई १-१ गोलको बराबरीमा ल्याएका थिए ।
क्रोएसियाले अब ब्राजिलसँग क्वाटरफाइनलमा खेल्नेछ ।
वि.सं.२०७९ मंसिर २० मंगलवार ०७:५८