अखबार नेपाल ट्रेन्डिङ

काठमाडौं: मनाङ मर्स्याङ्दी क्लबसँग १-१ गोलको बराबरीमा रोक्दै त्रिभुवन आर्मी क्लब सहिद स्मारक ‘ए’ डिभिजन लिग उपविजेता बनेको छ ।

लिगको आफ्नो अन्तिम खेलमा शनिबार मनाङसँग १-१ गोलको बराबरी खेलेपछि आर्मी उपविजेता बनेको हो ।

त्रिपुरेश्वरस्थित दशरथ रंगशालामा भएको रोमान्चक खेलमा सुरुआती अग्रता भने मनाङले बनाएको थियो । खेलको ४५औं मिनेटमा कप्तान अन्जन विष्टले गोल गर्दै मनाङलाई अग्रता दिलाएका थिए ।

तर, खेलको ७६ औं मिनेटमा मनाङका डिफेन्डर फ्रान्कलिनले आत्मघाती गोल गरेपछि आर्मीले १-१ गोलको बराबरी गरेको हो ।

बराबरीसँगै आर्मीले १३ खेलमा २३ अंक जोडेर लिगको उपविजेता बन्यो ।

लिगको उपाधि मछिन्द्र फुटबल क्लबले जितेको छ ।

मनाङले १२ खेलमा २१ अंक जोडेर पाँचौं स्थानमा रहदै लिगको अन्त्य गरेको छ ।

यसैबीच सातदोबाटोस्थित एन्फा कम्प्लेक्समा न्युरोड टिम एनआरटीले विभागीय टोली नेपाल पुलिस क्लबलाई ३-१ गोल अन्तरले हराउँदै तेस्रो बनेको छ ।

एनआरटीले एक गोलको अग्रतालाई उल्टाएर जित निकालेको हो ।

एनआरटीलाई जित दिलाउन मेसुके ओलोमोउले ह्याट्रिक गोल गरे ।

खेलको १२ औं मिनेटमा एनआरटीका डिफेन्डर शिव गुरुङले आत्मघाती गोल गरेपछि पुलिसले अग्रता बनाएको थियो ।

तर, खेलको ४७ औं मिनेटमा मेसुकेले गोल गर्दै एनआरटीलाई १-१ को बराबरीमा ल्याए ।

खेलको ६२ औं मिनेटमा मेसुकेले व्यक्तिगत दोस्रो गोल गर्दै एनआरटीलाई २-१ को अग्रता दिलाए ।

त्यसपछि खेलको ८३ औं मिनेटमा मेसुकेले ह्याट्रिक पूरा गर्दै एनआरटीलाई ३-१ को जित दिलाए ।

जितसँगै एनआरटीले तेस्रो स्थानमा रहदै लिगको अन्त्य गरेको छ ।

एनआरटीले १३ खेलमा २३ अंक जोड्यो भने पुलिसले १२ अंक जोड्यो ।