अखबार नेपाल ट्रेन्डिङ

काठमाडौं: विश्वभर ओमिक्रोन भरियन्टका संक्रमित बढ्दै जाँदा नेपालमा पनि यसको संक्रमण बढ्दै गएको छ ।

संक्रमितको संख्या थपिदै गएपछि अस्पतालहरुलाई हाईअलर्टमा रहन निर्देशन समेत दिएको छ ।

स्वास्थ्य तथा जनसंख्या मन्त्रालयका अनुसार नेपालमा थप २४ जना व्यक्तिमा ओमिक्रोन भेरियन्ट पुष्टि भएको जनाएको छ ।

आज (शुक्रबार) मन्त्रालयले विज्ञप्ति जारी गर्दै देशभरबाट संकलित नमूनाहरूको सिक्वेन्सिङ गर्दा थप २४ जनामा ओमिक्रोन पुष्टि भएको जानकारी दिएको छ ।

पुस महिनामा संकलित एक हजार १ सय ४३ पोजेटिभ नमूनाहरूको सिक्वेन्सिङ गर्दा २४ जनामा ओमिक्रोन पुष्टि भएको छ, विज्ञप्तिमा भनिएको छ ।

मन्त्रालयले ओमिक्रोन भेरियन्टले ल्याउन सक्ने जोखिमलाई मध्यनजर गर्दै सबै अस्पतालहरूलाई तयारी अवस्थामा रहन निर्देशन दिइएको जनाएको छ ।

साथै, सीमामा परीक्षणलाई थप सशक्त बनाइएको र पोजेटिभ भएकाहरूलाई आइसोलेसनमा राख्ने व्यवस्था गरिएको बताइएको छ ।

पछिल्लो समय भारतमा संक्रमण व्यापक फैलिएपछि त्यसको असर नेपालमा पनि देखिन सुरू भएको हो ।

गत मंगलबारदेखि नेपालमा क्रमिक रूपमा संक्रमितको संख्या वृद्धि भइरहेको छ ।

बिहीबार मात्र नेपालमा ५ सय ४० जनामा संक्रमण पुष्टि भएको थियो। जुन दुई महिनायताकै बढी संक्रमित संख्या हो ।

विज्ञहरूले यो संख्या थप बढ्ने भन्दै जतिसक्दो छिटो खोप लगाउन र जनस्वास्थ्यको मापदण्ड कडाइका साथ पालना गर्न सुझाएका छन् ।