अखबार नेपाल ट्रेन्डिङ

काठमाडौं: काठमाडौंको बौद्धस्थित एक घरको कोठाभित्र  मृत अवस्थामा युवायुवती  फेला परेको प्रहरीले जनाएको छ ।

गएराति काठमाडौं महानगरपालिका-६ बौद्धको राधाकृष्ण मन्दिरस्थित एक घरको कोठामा युवक र युवती मृत फेला परेको महानगरीय प्रहरी परिसर काठमाडौंका प्रहरी उपरीक्षक दिनेशराज मैनालीले जानकारी दिएका छन् ।

मृतकहरु संखुवासभाका २५ वर्षीय अनिस जिमी र खोटाङकी २२ वर्षीया युसिना राई रहेको प्रहरीले जनाएको छ ।

प्रहरीका अनुसार उनीहरू भिडिओ गेम पब्जीबाट नजिकिएका थिए ।

उनीहरू केही दिनदेखि लिभिङ टुगेदरमा बसेका थिए ।

वरिष्ठ उपरीक्षक सुदीप गिरीका अनुसार उनीहरू सँगै बस्न थालेको २०-२२ दिन मात्रै भएको थियो ।

उनीहरूबीच अनलाइन भिडिओ गेम पब्जीबाट चिनजान भएको थियो ।

घटनाका विषयमा प्रहरीले थप अनुसन्धान गरिरहेको छ ।