अखबार नेपाल ट्रेन्डिङ

एजेन्सीः इन्डियन प्रिमियर लिग (आईपीएल) टी-ट्वान्टी क्रिकेटको १३ औं संस्करण आज (शनिबार) बाट सुरु हुँदैछ ।

युएईको अबुधाबीमा साविक विजेता मुम्बई इन्डियन्स र उपविजेता चेन्नई सुपर किङ्सबीचको खेलसँगै आईपीएलको नयाँ सिजन सुरु हुनेछ ।

मुम्बई र चेन्नईबीचको खेल नेपाली समय अनुसार साँझ ७:४५ बजे सुरु हुनेछ । शेख जायद स्टेडियममा दुबै टिम जित निकाल्दै सुखद सुरुवात गर्न चाहन्छ ।

रोहित शर्माको कप्तानीमा मैदान उत्रने मुम्बई सुखद सुरुवात गर्न चाहन्छ । महेन्द्र सिंह धोनीको कप्तानीमा मैदान उत्रने चेन्नईविरुद्ध मुम्बईलाई सहज भने हुने छैन ।

यसपटक पनि आईपीएल शुरु हुनअघि साविक विजेता मुम्बईलाई नै उपाधि दावेदारको रुपमा हेरिएको छ, तर युएईको भुमिमा मुम्बईको रेकर्ड त्यति राम्रो देखिदैन ।

२०१४ मा भएको आईपीएलको शुरुवाती २० खेल युएईमा भएको थियो । मुम्बईले युएईमा खेलेको सबै ५ खेलमा हारको सामना गरेको थियो ।

उक्त संस्करणमा किंग्स ११ पञ्जाबले भने युएईमा सबै ५ खेलमा जित हासिल गरेको थियो ।

आईपीएलको उक्त संस्करणसम्मको रेकर्ड हेर्दा युएईको भुमिमा अपराजित रहने पञ्जाब एकमात्र टिम समेत हो ।