अखबार नेपाल ट्रेन्डिङ

एजेन्सी: जापानी यूवा खेलाडी टाकेफुसा कुबोलाई स्पेनिस क्लब भिल्ला रियलले अनुबन्ध गरेको छ ।

भिल्ला रियलले आधिकारीक रुपमा सोमबार जापानी मेस्सी भनेर चिनिने रियल मड्रिडका युवा खेलाडी कुबोलाई लोनमा अनुबन्ध गरेको हो ।

दुईपक्षबीच भएको सम्झौता अनुसार कुबोले एक सिजन भिल्ला रियलमा बिताउने छन् । भिल्ला रियलले कुबो क्लबमा आवद्ध भएको र उनले सिजन २०२०/२१ भिल्ला रियलबाट खेल्ने जानकारी गराएको छ ।

रियलले पनि आफ्ना भवि स्टारलाई एक बर्षका लागि महत्वपूर्ण जिम्मेबारी सहित भिल्ला रियल पठाएको जानकारी दिएको छ । रियलका अनुसार उनको सम्झौता २०२१ को जुन अन्तिममा सकिने छ ।

जापानी खेलाडी कुबो पछिल्लो पुस्ताका निकै सम्भावना बोकेका खेलाडी हुन् । बार्सिलोनाको एकेडेमीका उत्पादन कुबो उमेर हदका कारण बार्सिलोना छाड्दै जापान पुगेका थिए ।

जापानमा उनले शिर्ष डिभिजन क्लब टोकियो एफसीबाट लिग खेल्ने अवसर पाए । सोही क्रममा रियलले उनलाई अनुबन्ध गरेको थियो ।

कुबोले पनि अब रियलमा खेल्ने सोच बनाएकोले स्पेन बाहिर नजाने अभिब्यक्ति दिएका थिए । रियलले उनको रिलिज क्लज २२७ मिलियन पाउण्ड तोकेको भए पनि सिजन २०२१/२२ कुबोलाई टिममा समावेस गर्दै लालिगा खेल्ने उसको योजना छ ।

‘जापानको मेस्सी’ भनिने कुबोले जापानका लागि ७ खेल खेलिसकेका छन् । जापानको राष्ट्रिय टोलीमा २०१९ को जुनमा डेब्यू गरेका उनी लिभरपुलमा ब्यवसायीक फुटबल खेल्ने जापानी विंगर मिनामिनोको विकल्पको रुपमा राष्ट्रिय टोलीमा स्थान बनाउँदै आएका छन् ।