अखबार नेपाल ट्रेन्डिङ

काठमाडौं: नेपालमा २ सय ७८ जना कोरोना भाइरसका संक्रमित थपिएका छन् । योसँगै संक्रमित हुनेको संख्या २ हजार ९ सय १२ पुगेको छ । कोरोना संक्रमण ६८ जिल्लामा पुगेको स्वास्थ्य तथा जनसंख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले बताए । कोरोनाभाइरसबाट मृत्यु हुनेको संख्या ११ पुगेको छ ।

बुधबारराति मृत्यु भएका सुर्खेतका २८ वर्षे युवामा कोरोना ‘पोजिटिभ’ देखिएसँगै नेपालमा कोरोनाका कारण मृत्यु हुनेको संख्या ११ पुगेको पुष्टि भएको उनले जानकारी दिए । स्वास्थ्य तथा जनसंख्या मन्त्रालयका प्रवक्ता देवकोटाका अनुसार देशभर पछिल्लो २४ घण्टामा २ सय ७८ कोरोना संक्रमित थपिएका हुन् । उनले कोरोना भाइरसको संक्रमण देखिनेमा २ सय ६७ जना पुरुष र ११ जना महिला रहेका बताए ।

देशभर कुल कोरोना भाइरस संक्रमितको संख्या दुई हजार ९ सय १२ पुगेको छ । आज सातै प्रदेशका विभिन्न क्वारेन्टाइनमा १ लाख ६६ हजार ८ सय ६५ जना छन् । नोभेल कोरोना भाइरसको संक्रमणबाट सुर्खेतको पञ्‍चपुरीका २८ वर्षीय पुरुष मृत्यु भएको छ । अस्पतालबाट ‘डिस्चार्ज’ हुनेको संख्या ३ सय ३३ जना पुगेको छ । जसमा महिला ६१ जना छन् । शुक्रबार ४० जना डिस्चार्ज भएका छन् ।

सबैभन्दा बढी कोशी अञ्चल अस्पतालबाट २७ जना डिस्चार्ज भएका छन् । उनीहरु ६ देखि ११औं दिनको अवधिमा डिस्चार्ज भएका डा. देवकोटाले बताए । हाल देशभर एक लाख ६६ हजार ७ सय ६५ जना ‘क्वारेन्टिन’मा रहेका छन् । सबैभन्दा बढी सुदूरपश्चिम प्रदेशमा ६० हजार २ सय २६ जना रहेका छन् । २ हजार ५ सय ६८ संक्रमित व्यक्तिहरु ‘आइसोलेसन’मा रहेका उनले जानकारी दिए ।