अखबार नेपाल ट्रेन्डिङ

काठमाडौं: कोरोना भाइरस नियन्त्रणका लागि मानिसहरूको हिँडडुल नियन्त्रणमा मात्र भर नपर्न विश्व स्वास्थ्य सङ्गठन (डब्ल्यूएचओ)ले आग्रह गरेको छ । प्रत्येक सङ्क्रमण परीक्षण गरेर तथा सङ्क्रमित व्यक्तिको सम्पर्कमा भएका अन्य व्यक्तिलाई अलग्याउनु उक्त भाइरस विरुद्धको लडाइँमा महत्त्वपूर्ण हुने डब्लूएचओले बताएको छ ।

विभिन्न मुलुकहरुले ‘लकडाउन’ गरिरहँदा पनि कोरोना भाइरसको संक्रमण फैलने क्रम तीब्र भइरहेका बेला डब्ल्यूएचओका प्रमुख टेड्रोस एड्हानोम गेहब्रेयससले हिँडडुलमा गरिएको प्रतिबन्धले मात्र यसको रोकथामका लागि पर्याप्त नहुने बताएका छन् ।

विश्वमा तीन लाखभन्दा बढीमा कोरोना भाइरस सङ्क्रमण पाइएको भन्दै गेहब्रेयससले अझैपनि प्रकोपको गतिलाई परिवर्तन गर्न सकिने बताएका छन् । उनका अनुसार पहिलो केस भेटिएको ६७ दिनपछि एक लाखमा सङ्क्रमण पाइएकोमा अर्को ११ दिनमा दुई लाख मानिसमा यसको संक्रमण देखिएको थियो । त्यसको चार दिनमै तीन लाख मानिसमा यसको संक्रमण पुग्नुले संक्रमण फैलने दर उच्च रहेको डब्लूएचओले स्पष्ट पारेको छ ।