अखबार नेपाल ट्रेन्डिङ

काठमाडौं: कतारमा आयोजना हुने फिफा विश्वकपको दोस्रो चरणको छनोट अन्तर्गत नेपालले आज कुवेतसँग प्रतिस्पर्धा गर्दैछ । नेपालको पहिलो घरेलु खेलको रुपमा रहेको कुवेतसँगको खेल भुटानको थिम्पुस्थित चाङ्लिमिथाङ रंगशालामा नेपाली समय अनुसार दिउसो पौने ३ बजेबाट सुरु हुनेछ ।

नेपालको पहिलो होम खेलको रुपमा रहेको यस खेल यसअघि दशरथ रंगशाला हुने तय भएको थियो । तर, पुननिर्माण भईरहेको नेपालको दशरथ रंगशाला अन्तर्राष्ट्रिय मापदण्ड अनुसार नबनेपछि फिफा र एएफसीले खेल न्युट्रल भेन्युमा भुटानमा गर्ने निर्णय गरेको हो । यसैबीच नेपाली टिमका प्रशिक्षक कालिनले कुवेतबिरुद्धको खेलमा नेपालले उत्कृष्ट प्रदर्शन गर्ने विश्वास रहेको बताएका छन् । त्यस्तै नेपाली टिमका कप्तान किरण चेम्जोङले आफुहरु कुवेतबिरुद्ध अंक खोस्न तयार रहेको दावी गरेका छन् ।

यसअघि कुवेतबिरुद्धको खेल अघि बन्द प्रशिक्षणमा रहेका खेलाडी नाइट क्लबमा भेटिएको भन्दै एन्फाले बिमल घर्तिमगरसहित अन्जन विष्ट, सन्तोष तामाङ र दिनेश राजवंशीलाई टिमबाट बर्खास्त गरेको थियो । त्यसपश्चात सुवास गुरुङलाई टिममा समेटिएको थियो । यसअघि भएको ४ खेलमा नेपालले ३ खेलमा हार बेहोरिसकेको छ भने १ खेलमा जित निकालेको छ ।

पहिलो खेलमा कुवेतसँग नेपाल ७ शून्यले पराजित भएको थियो त्यसपछि चाइनिज ताइपेइसँग २ शून्यको जित निकालेको नेपाल अष्ट्रेलियासँग ५ शून्यले पराजित हुन पुगेको थियो । त्यस्तै नेपालले जार्डनसँग पनि ३-० को हार बेहोर्न पुग्यो । नेपाल ३ अंकसहित तालिकको चौथो स्थानमा रहेको छ भने कुवेत ४ अंक सहित तालिकको तेस्रो स्थानमा छ ।