अखबार नेपाल ट्रेन्डिङ

काठमाडौं: फिफा विश्वकप २०२६ को आयोजक तीन वटै राष्ट्र प्रतियोगिताबाट बाहिरिएका छन् । जारी विश्वकपमा आयोजक राष्ट्रको रुपमा रहेका अमेरिका, क्यानडा र मेक्सिको अन्तिम १६ बाटै बाहिरिएका छन् ।

मंगलबार बिहान भएको खेलमा बेल्जियमसँग ४-१ ले पराजित हुँदै अमेरिका प्रतियोगिताबाट बाहिरियो । समूह चरणमा अष्ट्रेलिया र पाराग्वेलाई पराजित गरेको अमेरिका टर्कीएसँग पराजित भएको थियो । समूह विजेता बन्दै अन्तिम ३२ मा पुगेको अमेरिकाले बोस्निया तथा हर्जगोभिनालाई पराजित गर्दै अन्तिम १६ मा पुगेको थियो ।

अपराजित रहँदै नकआउटमा पुगेको मेक्सिको इंग्ल्यान्डसँग पराजित भयो । समूह चरणमा दक्षिण अफ्रिका, दक्षिण कोरिया र चेक रिपब्लिकलाई पराजित गरेको मेक्सिकोले अन्तिम ३२ मा इक्वेडरलाई पराजित गरेको थियो ।

समूह चरणमा एक जित, एक हार र एक बराबरी खेलेको क्यानडाले अन्तिम ३२ मा सहज प्रतिस्पर्धी पायो । घरेलु मैदानमा दक्षिण अफ्रिकालाई हराउँदै क्यानडाले पहिलोपटक नकआउट चरणमा जित दर्ता गर्‍यो । तर, अन्तिम १६ मा मोरक्कोसँग पराजित हुँदा क्यानडाको विश्वकप यात्रामा पूर्णविराम लाग्यो ।