रौतहटमा प्रहरीद्वारा १२ राउण्ड हवाई फायर, कोरोना संक्रमितलाई आइसोलेसनमा लान खोज्दा झडप

२०७७, १६ जेष्ठ शुक्रबार १३:३८


रौतहट: रौतटहको इशनाथ नगरपालिकामा कोरोना भाइरस संक्रमितलाई आइसोलेसनमा लैजाने क्रममा शुक्रबार बिहान स्थानीय र प्रहरीबीच झडप भएको छ । इशनाथ नगरपालिका वाड नं. ७ जोकाहामा स्थानीय र प्रहरीबीच झडप भएको हो । आक्रोशित स्थानीयले प्रहरीको गाडी पनि तोडफोड गरेका छन् ।

बिहीबार कोरोना भाइरसको संक्रमण पुष्टि भएका दुई व्यक्तिलाई आइसोलेशनमा लान स्वास्थ्यकर्मी र प्रहरीको टोली पुग्दा स्थानीय वासिन्दाले अवरोध गरी प्रतिकार गरेपछि प्रहरीले १२ राउण्ड हवाई फायर समेत गरेको थियो । इशनाथ ७ को जोकहामा रहेको अनवारुल इस्लामीक मदरसामा रहेको क्वारेन्टाइनका २ व्यक्तिमा संक्रमण पुष्टि भएको थियो । कोरोना संक्रमित भएका दुवै जनालाई उपचारका लागि जिल्लाभित्रकै अर्को स्थानमा रहेको आइसोलेसनमा लाग्न चिकित्सक र सुरक्षाकर्मी पुगेका थिए ।

तर स्थानीय बासिन्दाहरुले उनीहरुलाई बाहिर लान नपाइने भन्दै प्रतिकार गरेपछि प्रहरीले बाध्य भएर हवाई फायर गर्नु परेको जिल्ला प्रहरी कार्यालय रौतहटले जनाएको छ । झडपमा स्थानीय सुरक्षाकर्मीले प्रयोग गर्ने सवारी साधानसमेत तोडफोड भएको छ । शहरभित्रै अधिक जनसंख्या रहेको र त्यहाँ विरामी अन्य नागरिक समेत सुरक्षित हुने अवस्था नभएकाले उनीहरुलाई अन्यत्र आइसोलेशनमा राख्नु परेको हो ।

भारतबाट नेपाल आएका व्यक्तिहरुमा कोरोना संक्रमण देखिएपछि रौतहटका स्थानीय तहकै क्वारेन्टाइनमा बस्दै आएका थिए । क्वारेन्टाइनमा बसेका व्यक्तिहरुमा कोरोना संक्रमण देखिदा अन्य व्यक्तिहरु समेत जोखिममा पर्ने भएकाले संक्रमितहरुलाई छुट्टै राख्नु परेको हो ।


Leave a Reply

Your email address will not be published. Required fields are marked *