नेपाल बङ्गलादेश बैंकले आफनो २७औं वार्षिकोत्सव मनायो


काठमाडौं:  नेपाल बङ्गलादेश बैंकले आफनो २७औं वार्षिकोत्सव मनाएको छ । नेपाल राष्ट्र बैंकबाट क वर्गको इजाजत प्राप्त गरी २०५१ साल जेठ २३ गतेदेखि नेपाल बङ्गलादेश बैंकले आफ्नो बैकिङ् कारोबार शुभारम्भ गरेको हो ।

 

यो बैंक विदेशी संयुक्त लगानीमा संचालित बैंक हो । मित्र राष्ट्र बंगलादेशको आईएफआईसी बैंकको ४०.९० प्रतिशत लगानी रहेको छ । बैंकले हाल सातै प्रदेशमा ९९ वटा शाखा, ८ वटा एक्सटेन्सन काउन्टर तथा ८१ वटा एटिएमबाट ग्राहकलाई बैकिङ्ग सुबिधा दिँदै आएको छ । बैंकले अत्याधुनिक बैकिङ् सुबिधाहरु दिनुको साथसाथै संस्थागत सामाजिक उत्तरदायित्वलाई सधै उच्च प्राथमिकतामा राख्ने गरेको छ ।

 

आफ्नो वार्षिकोत्सवको अवसर पारेर बैंकले हाल नेपालमा बढ्दो कोभिड १९ को संक्रमण र यसबाट हुनसक्ने मृत्युबाट नेपाली जनतालाई जोगाउने प्रयासमा हातेमालो गर्दै संस्थागत सामाजिक उत्तरदायित्व अन्तर्गत नेपाल सरकारलाई नेपाली ६६ लाख रुपैयाँ बराबरको २५०० भायल रेम्डिसिभिर इन्जेक्सन हस्तान्तरण गरेको छ ।

 

साथै, सुदुरपश्चिम प्रदेशको धनगढी उपमहानगरपालिका, महाकाली अञ्चल र टिकापुर अस्पताललाई ४ लाख रुपैयाँको आर्थिक सहयोग प्रदान गरेको छ । उक्त रकमबाट सेती प्रादेशिक अस्पताल, महाकाली अस्पताल र टिकापुर अस्पताललाई आवश्यक पर्ने अक्सिजन प्लान्ट स्थापना गर्ने, अक्सिजन सिलिण्डर तथा अक्सिजन कन्सनट्रेटर खरिद गरिनेछ ।

 

नेपाल बङ्गलादेश बैंकले आफनो वार्षिकोत्सवको अवसरमा आगामी दिनहरुमा अझ सुदृढ सेवा र सुविधा दिँदै ग्राहकको जीवनमा सहजता प्रदान गर्ने प्रतिबद्धता पनि गरेको छ ।

 

यो पनि पढ्नुहोस् :

नबिल बैंक र युनाइटेड फाइनान्सको एकैदिन विशेष साधारणसभा