जेठ ३१ गतेसम्म उपत्यकामा निषेधाज्ञा थपियो, किराना पसल बिहान ९ बजेसम्म खोल्न दिने निर्णय


काठमाडौं: दोस्रो लहरको कोरोना संक्रमण न्यूनिकरणका लागि उपत्यकामा जारी निषेधाज्ञा जेठ ३१ गतेसम्म थपिएको छ ।

 

जिल्ला प्रशासन कार्यालय काठमाडौं, भक्तपुर र ललितपुरका प्रमुख जिल्ला अधिकारीको मंगलबार र बुधबार बसेको बैठकले थप १० दिन निषेधाज्ञा लम्ब्याउने निर्णय गरेको हो ।

 

वैशाख १६ गतेबाट जारी निषेधाज्ञालाई निरन्तरता दिँदै जेठ १४ गतेबाट सो आदेशलाई थप कडा पारिएको थियो ।

 

जेठ १४ गतेबाट उपत्यकामा बन्द गरिएको किराना पसल तथा खाद्यान्नका डिपार्टमेन्ट स्टोर बिहान ९ बजेसम्म खोल्न दिने निर्णय गरेको छ ।

 

फलफूल र पुस्तक पसल पनि बिहान ९ बजेसम्म खुल्नेछन् ।

 

तरकारी पसलहरू सामाजिक दुरी कायम गरेर सञ्चालन गर्न पाइने छ । तोकिएका ठाउँ बाहेक अन्यत्र तरकारी पसल सञ्चालन गर्न रोक लगाइएको छ ।

 

निजी संघ-संस्था, सरकारी तथा अत्यावश्यक कार्यका लागि सम्बन्धित निकायको परिचय-पत्र चाहिने छ ।

 

व्यक्तिगत रुपमा सवारी चलाउन अत्यावश्यक परे प्रमुख जिल्ला अधिकारीले जारी गरेको पास चाहिने छ ।

 

विवाह तथा ब्रतबन्धमा बढीमा सात जनासम्म सहभागी भएर घर वा बसेको स्थानमा मात्र गर्न पाइने छ । तर, होटल र पार्टी प्यालेसमा गर्न पाइने छैन ।

 

विवाह र ब्रतबन्धको लागि एउटा सवारी साधन मात्रै प्रयोग गर्न पाइने छ ।

 

यसअघि जारी गरिएको कडा खालको निषेधाज्ञा बिहीबार राति १२ बजेसम्म लागू हुन्छ । त्यसपछि नयाँ नियम कार्यान्वयनमा आउने छ ।

 

नेप्सेमा आज उच्च अंकको बृद्धि, ११ अर्ब ३५ करोडको कारोबार