कांग्रेसको १४औं महाधिवशेन तोकिएको समयमा नहुने निश्चित


काठमाडौं: फागुनमा हुने भनिएको नेपाली कांग्रेसको १४औं महाधिवशेन तोकिएको समयमा नहुने निश्चित छ ।

प्रतिनिधिसभा विघटन प्रकरणले महाधिवेशन प्रभावित हुने देखिएको छ । यसअघि पार्टीमा आन्तरिक किचलो र कोरोनाले महाधिवेशन कार्यतालिका प्रभावित बन्दै आएको थियो । पार्टीले सडक आन्दोलनलाई प्राथमिकतामा राख्नुका साथै अदालतको फैसलाको प्रतीक्षा गर्ने नीति लिएकाले पनि महाधिवेशन कार्यतालिकाबारे बहस नै सुरु भएको छैन ।

प्रतिनिधिसभा विघटनको विषयले मंसिर मसान्तसम्म क्रियाशील सदस्यता वितरण नवीकरणलाई टुंगिने गरी यसअघि गरिएको कार्यतालिका कार्यान्वयन हुन सकेन । मंसिरभित्र क्रियाशील सदस्यता वितरण र नवीकरण नसकिएपछि पार्टीले समयावधि पुनः बढाएको छ । पुस १९ मा बसेको केन्द्रीय समितिको बैठकले माघ मसान्तसम्म सूची पठाउन जिल्ला कार्यसमितिहरूलाई निर्देशन दिएको छ ।

क्रियाशील सदस्यता वितरणअघि सकिनुपर्ने संगठन समायोजनको काम तीन जिल्लामा टुंगिन सकेको छैन । क्रियाशील सदस्यबाट नै महाधिवेशन प्रतिनिधि चुनिने भएकाले सबै नेताहरू आफ्नो पक्षमा सक्दो बढी क्रियाशील सदस्यता वितरण गर्न चाहन्छन् ।

१३औं महाधिवेशनमा भन्दा यसपटक शतप्रतिशतसम्म क्रियाशील सदस्यता बढाउन सकिने पदाधिकारी बैठकले निर्णय गरेको छ । जिल्ला कार्यसमितिले माग गरेको अवस्थामा क्रियाशील सदस्यको संख्या बढाउन सकिने निर्णय केन्द्रले गरेको छ । १३औं महाधिवेशनमा ४ लाख ७० हजार क्रियाशील सदस्य थिए । संख्या थप्ने निर्णयले कांग्रेसका क्रियाशील सदस्य १४औं महाधिवेशनमा करिब १० लाख पुग्नेछ ।

निर्धारित समयभित्र क्रियाशील सदस्यता चयन नभएपछि महाधिवेशनका अन्य कार्यतालिका स्वतः प्रभावित हुने गरेको छ । पुसमा जिल्ला र माघमा प्रादेशिक अधिवेशन गर्ने कार्यतालिका क्रियाशील सदस्यता नटुगिंदा प्रभावित बनेको छ ।

सभापति शेरबहादुर देउवा र नेता कृष्णप्रसाद सिटौला पक्ष फागुनमा महाधिवेशन हुन नसक्नेमा भदौ महिनामै एकमत थिए । कार्यतालिका प्रभावित गराउन संस्थापनले भूमिका खेलेको वरिष्ठ नेता रामचन्द्र पौडेल पक्षको आरोप लगाउँदै आएको थियो । तोकिएको समयमा काम नगरेपछि नयाँ मिति तोकेर मात्रै महाधिवेशन हुन नसक्ने ठहर पौडेल पक्षका थियो ।

जारी केन्द्रीय समितिको बैठक महाधिवेशनको विषयमा कम मात्र केन्द्रित देखिएको छ । क्रियाशील सदस्य वितरण नवीकरणलाई समय थपिए पनि तल्लो तहको अधिवेशनका सन्दर्भमा कुनै निर्णय गरिएको छैन ।

प्रतिनिधिसभा विघटनविरुद्ध पार्टीको औपचारिक निर्णय गर्न बसेको बैठकले सरकारविरुद्ध सडक प्रर्दशनलाई महत्व दिएको छ । प्रतिनिधिसभा विघटन विरुद्ध प्रदेश निर्वाचन क्षेत्रमा पुस ३ र पालिका स्तरमा माघ ३ मा विरोध प्रर्दशन गरिने भएको छ ।

माघ ८ मा वडातहमा विरोध प्रर्दशन गरिने भएको छ । पार्टी संस्थापन पक्ष प्रतिनिधिसभा विघटनको मुद्दालाई अदालतले किनारा लगाएपछि मात्रै महाधिवेशनको मिति तोक्ने पक्षमा कांग्रेस देखिएको छ ।



Leave a Reply

Your email address will not be published. Required fields are marked *